SERIKALI YAKUBALI FAO LA KUJITOA LISIWE MPAKA WAKATI WA KUSTAAFU

BAADA ya baadhi ya wabunge na wafanyakazi nchini, kulalamikia Sheria za Mifuko ya Hifadhi ya Jamii, hatimaye Serikali imeruhusu fao la kujitoa kwa wanachama wa mifuko hiyo.

Serikali ilitoa tamko rasmi bungeni jana, ambapo imeridhia kuondoa zuio la fao la kujitoa, katika kipindi hiki ambacho inajiandaa kuwasilisha muswada wa sheria utakaokidhi matakwa ya Azimio la Bunge.

Tamko hilo, lilitolewa bungeni jana na Waziri wa Kazi na Ajira, Gaudensia Kabaka, ambaye alisema Serikali imefikia uamuzi huo, baada ya kuzingatia ushauri uliotolewa na wabunge.

Alisema fao la kujitoa kwa kawaida, linatolewa kwa masharti yanayomhusu mwanachama mmoja mmoja, katika mazingira mahususi.

Agosti, 2012 Mamlaka ya Kusimamia na Kudhibiti Mifuko ya Hifadhi ya Jamii (SSRA), iliagiza mifuko iliyokuwa ikitoa fao la kujitoa, kusitisha kufanya hivyo.

“Lengo kuu, lilikuwa kuwezesha mamlaka kutoa vikokotoo vipya vya mafao vyenye manufaa kwa wanachama, bila kuathiri afya ya mifuko husika.

“Kwa kuzingatia mchakato huu, ulioanza wa kuangalia upya Sheria ya Mifuko ya Hifadhi ya Jamii, Mamlaka ya Usimamizi na Udhibiti wa Sekta ya Hifadhi ya Jamii (SSRA), imekwishaondoa agizo la kuzuia mifuko kutoa fao la kujitoa.

“Kufuatia hatua hiyo, mifuko yote itaendelea kutoa fao hilo kama ilivyokuwa kabla ya zuio hilo na kwa vigezo vile vile kwa wanachama wanaostahili kupata fao hilo,” alisema.

Alisema hatua hiyo, itaiwezesha Serikali kupata muda wa kutosha, kuandaa na kuleta Muswada wa Sheria unaokidhi matakwa ya Azimio la Bunge na mahitaji ya kuwa na mfumo endelevu wa Mifuko ya Hifadhi ya Jamii.

Alisema hakuna ubishi kwamba, hoja binafsi iliyowasilishwa na Mbunge wa Kisarawe, Suleiman Jafo (CCM) na kuungwa mkono na wabunge ina umuhimu mkubwa.

Alisema pamoja na mapendekezo yaliyojitokeza, Serikali iliunda kikosi kazi, ambacho kilifanya utafiti na kuandaa mapendekezo, ili kuona iwapo kuna manufaa ya kuendelea na mfumo uliopo au iwapo unahitajika mfumo mpya, kama ilivyokusudiwa katika Muswada wa Marekebisho ya Sheria ya Hifadhi za Jamii, kama zilivyorekebishwa katika Bunge la Aprili, mwaka huu.

Alisema kikosi kazi kimekamilisha taarifa yake hivi karibuni na kuiwasilisha serikalini na baada ya kuipitia taarifa hiyo, imebaini kwamba, yapo mambo ya msingi kadhaa ambayo sharti yawe yameshughulikiwa kwanza kwa kina kabla ya kuandaliwa kwa Muswada utakaokidhi matakwa ya hoja ya Jafo.

Hoja hizo zilizingatia sheria iweke vifungu vinavyoruhusu watumishi kutumia kiasi cha mafao yao ya uzeeni, kulipia mikopo ya nyumba.

Kutoa mapendekezo ya marekebisho ya sheria, kuhakikisha mifuko iliyoko kwenye sekta hiyo, inalinda haki za wanachama wao kwa namna inayojitosheleza.

Akizungumza na MTANZANIA nje ya ukumbi wa Bunge, Mbunge wa Kisarawe, Selemani Jafo alisema, amefurahishwa na uwamuzi wa Serikali wa kuruhusu fao la kujitoa.

Hata hivyo alisema, Serikali kuruhusu fao la kujitoa haina maana kuwa, hoja yake imekwisha na kueleza kuwa, kilichobaki ni maandalizi ya muswada wa sheria itakayokidhi mahitaji kulingana na Azimio la Bunge.

“Nimefurahishwa sana uwamuzi wa Serikali wa kuruhusu fao la kujitoa, liendelee kama ilivyokuwa zamani, hoja yangu ilikuwa na mambo mengi, lakini fao la kujitoa ndiyo ilikuwa kilio changu kikubwa ambacho ni kilio cha wafanyakazi.

“Kwa uwamuzi huu Serikali, mwanachama yeyote wa mfuko wowote wa hifadhi ya jamii, hahitaji tena kusubiri hadi afikie miaka 55, ndipo akachukue mafao yake, hii ni hatua kubwa,” alisema.